⨀第3季「台語文學作品前導讀冊討論會」
今年度選擇《陳明仁台語文學選》作為讀冊討論會閱讀書目，預計閱讀陳明仁的散文、小說、劇本等選文；由打狗台語開講社讀冊會組成員領讀，討論作品中的台語文用字，解釋涵義；討論會結束後以白話字、漢羅合用撰寫文字記錄。
承辦單位│高雄市立圖書館、高雄文學館、打狗台語開講社、台文博覽會
⨀關於台語文學系列講座
Súi--ah！好--ah！咱台文！
本系列為台文博覽會、打狗台語開講社與高雄文學館合作舉辦。全年度線上舉行，每三個月為一主題，共有四大主題，分別為：1～3月「歌仔冊文學世界」、4～6月「台語文學運動史」、7～9月「台語文學作品chhōa讀討論會」（現場舉行）、10～12月「台文作家chhōa寫作」。
▪️
地點：高雄文學館2樓文學討論室
Bûn-jī kì-lio̍k: Ông E̍k-khái
漢羅合用
今á日（7月23）是陳明仁台語文學前導讀冊討論會第2場，由打狗台語開講社ê導師團隊來chhōa讀。這是台文博覽會(TÂI-BÛN EXPO)舉辦ê「2023台語文學系列講座」第3季活動，號做「陳明仁台語文學前導讀冊討論會」。Tī這ê討論會讀ê冊是台語文學家－－陳明仁先生ê《陳明仁台語文學選》。
活動纔頭á，打狗台語開講社社團負責人鄭智程紹介打狗台語文促進協會8--月beh辦理ê活動kap協會理念，hō͘對台語文有趣味ê學員有機會thang對台語文有koh khah深ê接觸kap理解，ǹg望咱社會愈來愈chē人來熟似咱在地文學ê súi。
接續，因為有1位頂pái m̄ bat來參加--過ê新學員，導師chiū請i簡單紹介ka-tī ê背景，koh有分享ka-tī對台語文ê想法kap經驗。Tī自我紹介ê當中，新學員有講tio̍h i自細漢tī厝--ni̍h lóng是講台語，m̄-koh tī厝--ni̍h lóng kan-na會講1-kóa chin日常chin簡單ê話句，無法度有機會對台語有koh khah深ê熟似，所致chiū來參加這ê討論會，ǹg-bāng會當認bat台語koh khah深koh khah súi ê所在。
這pái ê討論會kap頂1場仝款是讀陳明仁ê散文作品，有〈Gōng清--á買獎券tio̍h大獎〉kap〈顧口--ê kap辯士〉這2篇。
〈Gōng清--á買獎券tio̍h大獎〉這篇故事主要是teh講台灣以早農業社會ê情境。故事ê主角是1位號做清--á ê做田人，清--á為tio̍h beh thàn chhōa-bó͘ ê聘金ta̍k工lóng chin骨力做穡。落尾，因為想beh透過買獎券thàn大錢，mā因為án-ne kap姑娘培養出感情，甚至m̄免聘金chiū chhōa tio̍h彼位姑娘--ah。確實chiū親像彼位姑娘講--ê「世間真正ê瘦人是連希望to無ê人。」勉勵人凡事bē當因為無把握chiū先kā機會hìⁿ-sak，nā hō͘ ka-tī機會去試看māi，凡勢會得tio̍h料想不到ê好結果。
〈顧口--ê kap辯士〉這篇會當了解古早台灣時代，咱tú開始發展ê時是啥物款ê狀況，有啥物款ê行業隨故事ê劇情讀--落-來mā會當hō͘人感受tio̍h彼ê年代環境teh變化。陳明仁先生寫作ê風格tiāⁿ-tiāⁿ會展現緣份無常，無論結果姻緣有成抑是無成，lóng會hō͘人對故事產生chiâⁿ深ê印象。
活動teh進行ê時chūn，為tio̍h hō͘學員知影ka-tī讀--ê kám有正確，學員nā有讀m̄-tio̍h ê所在，導師會隨糾正讀1 pái正確--ê hō͘大家聽。1人會讀1段，nā1段讀了會hō͘大家提有憢疑ê部份，導師會chhōa大家討論。
討論語詞ê時，結合導師kap學員對生活當中ê經驗掠外，mā有配合ChhoeTaigi等等數位資源梨chhiâu-chhōe辭典、圖片，iáu是文獻資料。使用ChhoeTaigi chhōe詞ê好處chiū是會用得比照無仝時期ê資料，hō͘人會當判斷仝1 ê詞tī無仝ê時代有啥物款無仝ê解說。
大家teh討論ê過程當中，mā回想起chin chē無論是厝--ni̍h抑是tī社會上teh使用台語ê記持。Ta̍k ê人對1 ê詞ê解說凡勢有精差抑是無仝ê講法，這chiū是討論會siōng kài趣味mā siōng迷--人ê所在。
白話字
Kin-á-ji̍t (7/23) sī Tân Bêng-jîn Tâi-gí Bûn-ha̍k
Chiân-tō Tha̍k-chheh Thó-lūn-hōe tē 2 tiû, iû Tá-káu Tâi-gí Khai-káng-siā ê
tō-su thoân-tūi lâi chhōa tha̍k. Che sī Tâi-bûn Phok-lám-hōe (TÂI-BÛN EXPO)
kí-pān ê “2023 Tâi-gí Bûn-ha̍k Hē-lia̍t Káng-chō" tē 3 kùi hoa̍t-tōng,
hō-chò “Tân Bêng-jîn Tâi-gí Bûn-ha̍k Chiân-tō Tha̍k-chheh Thó-lūn-hōe”. Tī chit
ê thó-lūn-hōe tha̍k ê chheh sī Tâi-gí bûn-ha̍k-ka Tân Bêng-jîn sian-seⁿ ê “Tân
Bêng-jîn Tâi-gí Bûn-ha̍k-soán”.
Hoa̍t-tōng chhím-thâu-á, Tá-káu Tâi-gí Khai-káng-siā
siā-thoân hū-chek-jîn Tēⁿ Tì-têng siāu-kài Tá-káu Tâi-gí-bûn Chhiok-chìn
Hia̍p-hōe 8--goe̍h beh pān-lí ê hoa̍t-tōng kap hia̍p-hōe lí-liām, hō͘ tùi
Tâi-gí-bûn ū chhù-bī ê ha̍k-oân ū ki-hōe thang tùi Tâi-gí-bûn ū koh khah chhim
ê chiap-chhiok kap lí-kái, ǹg-bāng lán siā-hōe jú lâi jú chē lâng lâi se̍k-sāi
lán chāi-tē bûn-ha̍k ê súi.
Chiap-sòa, in-ūi ū 1 ūi
téng-pái m̄-bat lâi chham-ka--kòe ê sin ha̍k-oân, tō-su chiū chhiáⁿ i kan-tan
siāu-kài ka-tī ê pōe-kéng, koh ū hun-hióng ka-tī tùi Tâi-gí-bûn ê siūⁿ-hoat kap
keng-giām. Tī chū-ngó͘ siāu-kài ê tong-tiong, sin ha̍k-oân ū kóng tio̍h i chū
sè-hàn tī chhù--ni̍h lóng sī kóng Tâi-gí, m̄-koh tī chhù--ni̍h lóng
kan-na ē kóng 1-kóa chin ji̍t-siông chin kán-tan ê ōe-kù, bô hoat-tō͘ ū ki-hōe
tùi Tâi-gí ū koh khah chhim ê se̍k-sāi, só͘-tì chiū lâi chham-ka chit ê
thó-lūn-hōe, ǹg-bāng ē-tàng jīn-bat Tâi-gí koh khah chhim koh-khah súi ê
só͘-chai.
Chit pái ê thó-lūn-hōe kap téng 1 tiûⁿ kâng-khoán sī
tha̍k Tân Bêng-jîn ê sàn-bûn chok-phín, ū “Gōng Chheng--á bé chióng-kǹg
tio̍h tōa-chióng” kap “Kò͘-kháu--ê kap piān-sū” chit 2 phiⁿ.
“Gōng Chheng--á bé chióng-kǹg tio̍h tōa-chióng” chit phiⁿ
kò͘-sū chú-iàu sī teh kóng Tâi-oân í-chá lông-gia̍p siā-hōe ê chêng-kéng.
Kò͘-sū ê chú-kak sī 1 ūi hō-chò Chheng--á ê chò-chhân-lâng, Chheng--á ūi-tio̍h
beh thàn chhōa-bó͘ ê phèng-kim ta̍k-kang lóng chin kut-la̍t chò-sit. Lo̍h-bóe,
in-ūi siūⁿ-beh thàu-kòe bé chióng-koàn lâi thàn hi-bāng chiū se̍k-sāi hit ūi bē
chióng-koàn ê ko͘-niû. Sui-bóng bô in-ūi chióng-koàn thàn tōa-chîⁿ, mā in-ūi
án-ne kap ko͘-niû pôe-ióng chhut kám-chêng, sīm-chì m̄-bián phèng-kim chiū
chhōa tio̍h hit ūi ko͘-niû--ah. Khak-si̍t chiū chhin-chhiūⁿ hit ūi ko͘-niû
kóng--ê “Sè-kan chin-chiàⁿ ê sán-lâng sī liân hi-bāng to bô ê lâng.” Bián-lē
lâng hoān-sū bē-tàng in-ūi bô pá-ak chiū seng kā ki-hōe hìⁿ-sak, nā hō͘ ka-tī
ki-hōe khì chhì khòaⁿ-māi, hoān-sè ē tit-tio̍h liāu-sióng put tò ê hó kiat-kó.
“Kò͘-kháu--ê kap piān-sū” chit phiⁿ ē-tàng liáu-kái
kó͘-chá Tâi-oân sî-tāi, lán tiān-iáⁿ tú khai-sí hoat-tián ê sî sī siáⁿ-mih
khoán ê chōng-hóng, ū siáⁿ-mih khoán ê hâng-gia̍p, sûi kò͘-sū ê kio̍k-chêng
tha̍k--lo̍h-lâi mā ē-tàng hō͘ lâng kám-siū tio̍h hit ê nî-tāi khoân-kéng teh
piàn-hòa. Tân Bêng-jîn sian-seⁿ siá-chok ê hong-keh tiāⁿ-tiāⁿ ē tián-hiān
iân-hūn bû-siông, bô-lūn kiat-kó in-iân ū sêng ia̍h-sī bô sêng, lóng ē hō͘
lâng tùi kò͘-sū sán-seng chiâⁿ chhim ê ìn-siōng.
Hoa̍t-tōng teh chìn-hêng ê sî-chūn, ūi-tio̍h hō͘
ha̍k-oân chai-iáⁿ ka-tī tha̍k--ê kám ū chèng-khak, ha̍k-oân nā ū tha̍k m̄-tio̍h
ê só͘-chai, tō-su ē sûi kiú-chèng tha̍k 1 pái chèng-khak--ê hō͘ tāi-ke thiaⁿ.
1 lâng ē tha̍k 1 tōaⁿ, nā 1 tōaⁿ tha̍k liáu ē hō͘ tāi-ke thê ū giâu-gî ê
pō͘-hūn, tō-su ē chhōa tāi-ke thó-lūn.
Thó-lūn gí-sû ê sî, kiat-ha̍p tō-su kap ha̍k-oân tùi
seng-oa̍h tong-tiong ê keng-giām lia̍h-gōa, mā ū phòe-ha̍p ChhoeTaigi téng-téng
sò͘-ūi chu-goân lâi chhiâu-chhōe sû-tián, tô͘-phìⁿ, iáu-sī bûn-hiàn chu-liāu.
Sú-iōng ChhoeTaigi chhōe sû ê hó-chhù chiū-sī ē-iōng-tit pí-chiàu bô kâng sî-kî
ê chu-liāu, hō͘ lâng ē-tàng phòaⁿ-toàn kâng 1 ê sû tī bô kâng ê sî-tāi ū
siáⁿ-mih khoán bô kâng ê ké-soeh.
Tāi-ke teh thó-lūn ê kòe-têng tong-tiong, mā hôe-sióng
khí chin chē bô-lūn sī chhù--ni̍h a̍h-sī tī siā-hōe siōng teh sú-iōng Tâi-gí ê
kì-tî. Ta̍k ê lâng tùi 1 ê sû ê ké-soeh hoān-sè ū cheng-chha a̍h-sī bô kâng ê
kóng-hoat, che chiū-sī thó-lūn-hōe siōng kài chhù-bī mā siōng bê--lâng ê
só͘-chai.
